Unha persoa perdeu a vida esta mañá tras unha saída de vía en Chantada. O accidente tivo lugar 15 minutos antes das 10:00 horas, momento no que un particular empregou o número único de emerxencias para avisar do sucedido. Segundo lle indicou ao 112 Galicia, un vehículo sufrira unha saída de vía no quilómetro 37 da CG-2.1, en Muradelle. O alertador non sabía especificar se a persoa estaba atrapada.
Con estes datos, os xestores do 112 Galicia solicitaron a intervención do Servizo de Urxencias Sanitarias de Galicia-061, dos Bombeiros de Chantada e da Garda Civil de Tráfico.
A dotación de bombeiros empregou o material de excarceración para liberar á vítima, única ocupante do coche. Pese aos esforzos, o persoal sanitario que se mobilizou ata a zona indicou que o implicado falecera, sen que nada se puidese facer por salvarlle a vida.
Tamén en San Cibrao perde a vida unha moza de 28 anos nun accidente pouco antes das 8:30 horas desta mañá. O 112 Galicia recibiu unha chamada, o alertador indicou que vía un vehículo nunha cuneta, no quilómetro 2 da LU-P-1510, cunha persoa fóra do coche apoiada na ventá, aparentemente falecida.
Decontado, os xestores do 112 Galicia pasaron o aviso ao Servizo de Urxencias Sanitarias de Galicia-061, aos Bombeiros de Viveiro, á Garda Civil de Tráfico e á Policía Local.
Os servizos de emerxencia desprazados ata a zona confirmaron que a vítima, única ocupante do vehículo, estaba falecida. Ademais, indicaron que se tratara dunha saída de vía.
