Os Bombeiros de Vilalba atoparon o corpo sen vida do home no interior da casa, que resultou totalmente calcinada.
Segundo a información recollida no 112 Galicia, o tellado e as paredes da vivenda colapsaron por mor dos efectos das lapas. Os feitos sucederon no lugar de Sixto, ao fío das 20:00 horas da pasada tarde.
Nese momento, os axentes da Garda Civil e varias persoas particulares contactaron co 112 Galicia para dar conta do lume. Axiña, os xestores do Centro Integrado de Atención ás Emerxencias (CIAE) 112 Galicia solicitaron a intervención dos Bombeiros de Vilalba e dos membros do Servizo Municipal de Protección Civil. Ademais, informaron a Urxencias Sanitarias de Galicia-061.
Cómpre sinalar que foi necesaria a intervención dun retén do distrito forestal da zona, que controlou que o incendio non chegase ao monte.
Foto: arquivo Xornal de Lugo.
