Un incendio arrasou por completo un ático e afectou ás vivendas lindeiras. Ocorreu ás 20:15 horas de onte en Chantada.
O lume iniciouse no ático do número sete da Rúa Formoso Lamas e estendeuse ás casas situadas a cada lado. A unha resultoulle afectado o tellado e á outra o canalón. A peor parte foi para o ático, que quedou inservible. Por fortuna, ninguén resultou ferido, pese a que a vivenda estaba ocupada no momento de producirse o incendio.
Foi, precisamente, o ocupante quen chamou ao 112 Galicia para informar dun incendio no seu tellado. Decontado, o persoal do Centro de Atención ás Emerxencias avisou aos Bombeiros de Chantada, que, poucos minutos despois, conseguiron controlar as lapas.
Ademais, os xestores do 112 pediron a colaboración dos axentes da Policía Local e dos voluntarios de Protección Civil.
