Faltaban dez minutos para as 13 horas cando un particular informou ao 112 Galicia sobre o accidente, que ocorreu diante dun supermercado da avenida da Mariña, no municipio lucense de Lourenzá. O alertador indicou que se trataba dun traballador da recollida do lixo que quedou atoado na trituradora do camión e era incapaz de liberarse.
De inmediato, os xestores do Centro Integrado de Atención ás Emerxencias solicitaron a intervención de Urxencias Sanitarias de Galicia-061, dos Bombeiros de Barreiros, do GES da Pontenova, da Garda Civil e da Agrupación de Voluntarios de Protección Civil de Lourenzá.
Unha vez alí, os bombeiros procederon a excarcerar ao traballador, que seguía atrapado dentro do camión e, tras sacalo do vehículo, foi atendido polos profesionais sanitarios. Os medios no punto confirmaron que o home sufriu lesións nas pernas, pero permaneceu consciente en todo momento.
Pola súa banda, Urxencias Sanitarias de Galicia-061 chegou a valorar a mobilización do helicóptero medicalizado con base en Santiago, aínda que non tivo que intervir: o implicado foi finalmente atendido e trasladado a bordo dunha ambulancia.
