O Auditorio Municipal de Vilalba acollerá durante o mes de maio as proxeccións dos filmes galegos Ons de Alfonso Zarauza, A illa das mentiras de Paula Cons, Arima de Jaione Camborda e Lúa Vermella de Lois Patiño.
A Deputación de Lugo e a Academia Galega do Audiovisual promoven, coa colaboración do Instituto de Estudos Chairegos, este ciclo de cinema galego, que reúne as catro películas finalistas aos Premios Mestre Mateo na categoría de Mellor Longametraxe.
As proxeccións realizaranse os sábados 1, 15, 22 e 29 ás 19.30 horas con entrada de balde, previa inscrición para garantir o control da capacidade e o cumprimento das medidas de prevención fronte á Covid 19.
“Desde a Academia Galega do Audiovisual trasladáronnos á necesidade de ampliar o eco dos Mestre Mateo e reforzar a difusión do cinema galego nun ano no que as restricións obrigadas pola pandemia condicionaron a actividade nas salas comerciais. Con ese obxectivo puxemos en marcha este ciclo, que permite desfrutar na pantalla grande das mellores filmes galegos do momento”, explicou a vicepresidenta da Deputación.
