Voltan un ano máis – e xa van seis- os Premios ‘Son Muller’, que recoñecen o papel das mulleres emprendedoras -especialmente do rural- como piar e motor económico. Os premios, que están impulsados pola Asociación de Mulleres empresarias da Provincia de Lugo (AELU), foron presentados esta mañá no CEI Nodus de Lugo.
A Asociación de Mulleres Empresarias dota os premios Son Muller con 1.000€ en metálico á gañadora e o segundo, en 500€. En ambos casos, as galardoadas obterán un ano de cota gratuíta como asociadas de AELU e un xogo de artesanía en cerámica, Matrioskiñas Galegas, elaborado e deseñado exclusivamente para estes premios.
Haberá tamén un recoñecemento especial a unha empresaria lucense referente e pioneira no eido social e económico de Lugo. O xurado estará formado por representantes da xunta directiva de AELU, e personalidades de recoñecido prestixio, pertencentes a distintos ámbitos das administracións, a empresa e a sociedade lucense.
Poderán optar aos galardóns as emprendedoras e empresarias que teñan o seu domicilio social e fiscal como empresa na provincia, que estean dadas de alta como autónomas ou sexan parte dunha sociedade empresarial.
Este ano haberá tres categorías: Empresaria Rural, Empresaria e emprendedora. As candidaturas pódense presentar na páxina web empresariaslugo.org entre o 2 e o 26 de novembro, e a entrega de premios terá lugar o 15 de decembro.
